Аҳмеҭ Хапаҭ Аҧсуа Федерациа еиҳабыс далхуп.

Ҭырқәтәыла, Сҭампыл ақалақь аҟны имҩаҧысит аҧсуаа ркультуратә хеидкылақәа рфедерациа анапхгаҩ ҿыц иалхрақәа. Уи еиҳабыс иӡбахә ҳәоуп Аҳмеҭ Хапаҭ. Алхрақәа мҩаҧысит иаарту бжьыҭирала. Иараӡәк иакәын алхрақәа рҟны зкандидатура ықәгылаз. Убри аҟынтә, зегь еицҿакны, напҩахарыла иӡбахә ҳәан Аҳмеҭ Хапаҭ. Аҳмеҭ, Аҧсуа Федерациа ашьаҭаркыҩцәа дыруаӡәкыуп. Ҧшьышықәса инеиҧынкыланы, Афедерациа маӡаныҟәгаҩ хадас дыҟан, анаҩсгьы активла уи имҩаҧнагоз аусурақәа зегьы дрылахәын.
Аҧсуа Федерациа еиҿкаан 2010шықәса рзы. Есҩышықәса, уи ахадацәа рыҧсахуеит. Раҧхьа, Афедерациа напхгаҩыс даман Феридун Аҟәысба, анаҩс, Џьенгиз Ашәба, уажәы, Аҳмеҭ Хапаҭ. Аҧсуа Федерациа, ҳҳәынҭқарреи ҳауаажәларреи ринтересқәа ахьчоит. Ҳџьынџьуаа рҭоурыхтә ҧсадгьыл радыҧхьаларазы аусқәа мҩаҧнагоит. Ҳмилаҭ культуратә хаҿра, атәым милаҭ рҟны, аиқәырхара аҽазнашәоит. Иалнаршахьоу аусқәа рацәоуп, аҧхьаҟагьы имаҷым аҿаҧхьа иқәгылоу ахықәкқәа.
Сҭампыл имҩаҧысыз Аҧсуа Федерациа анапхгаҩ ҿыц иалхрақәа, Аҧснынтә аделегациа алахәын. Ауаажәларратә еиҿкаара "Жәларбжьаратәи афонд Аҧсны" ахьӡала, аусмҩаҧгатәқәа иҽрылаирхәит афонд ахада Сонер Гогәуа.
"Жәларбжьаратәи афонд Аҧсны" ахьӡала, аҧсуаа ркультуратә хеидкылақәа рфедерациа, ақәҿиарақәеи, аихьӡарақәеи азеиӷьаҳшьоит!

Ҭырқәтәыла еиҿкаау Аҧсуа Федерациа аиҳабы

Аҳмеҭ Хапаҭ шәахь

Ҳаҭыр зқәу Аҳмеҭ Хапаҭ!

Ауаажәларратә еиҿкаара «Жәларбжьаратәи афонд Аҧсны» ахьӡала, гәык-ҧсык ала ишәзеиӷьасшьоит хадара ззыжәуа шәмаҵзура ҿыц аҟны аихьӡарақәа. Ҭырқәтәыла  еиҿкаау аҧсуаа ркультуратә хәышҭаарақәа еидызкыло Аҧсуа Федерациа, аамҭа кьаҿк иалагӡаны, ирацәоуп ҳҳәынҭқарреи ҳауаажәларреи рҿаҧхьа иқәгылоу хра злоу азҵаарақәа рыӡбараҟны имҩаҧнагахьоу ауснагӡатәқәа, иаанарҧшхьо алагалақәа. Хадаратәла изызнеиуа хықәкқәоуп, аҳәаанырцә инхо ҳдиаспора рҭоурыхтә ҧсадгьыл радыҧхьалара, ҳџьынџьуааи ҳареи ҳаимадара аизырҳара, аполитикатә, асоциал-економикатә ҭагылазаашьа аҿиара, амилаҭ-культуратә хаҿра аиқәырхара уҳәа, хыҧхьаӡара рацәала азҵаарақәа.

Ҳарҭ, ҳаидгыланы аусеицура анҳалҳарша, хымҧада, ҳзеиҧш ус алҵшәа маиурц залшом, ҳаззымиааиуа ҟалом. Аҭакҧхықәра ду зцу шәмаҵзураҿы, агәацҧыҳәареи, аманшәалареи шәыцзааит!

Ҳаҭырла,

Сенер Гогәуа

Ауаажәларратә еиҿкаара

«Жәларбжьаратәи афонд Аҧсны» ахада