ANUGA-афатәқәа рааглыхратә цәыргақәҵа Германиа

«Жәларбжьаратәи афондАҧсны» ахада ихаҭыҧуаҩ Мақсим Ӷәынџьиа, арҭ амшқәа рзы  Германиа, Кельн имҩаҧысуа Жәларбжьаратәи афатәқәа рааглыхратә цәыргақәҵа ANUGА далхәуп.

ANUGA- афатәқәа рцәыргақәҵа аганахь ала, адунеи аҿы зегь реиҳа зымҽхак ҭбаау цәыргақәҵоуп.  Адунеи ахы-аҵыхәа аҟынтә уи еиднакылоит зқьыла анаплакқәа. Ааглыхра иамҽханакуа азҵаарақәа хадаратәла иахьазнеиуа азы, ANUGA афатә индустриаҟны аҧхьагылара амоуп. Адунеи аҿы иҭрыжьуа афатәқәа зегьы цәыргақәҵоуп. 80%  ацәыргақәҵа алахәцәа, анаплакқәа рхадацәа роуп, азҵаарақәа рыӡбаразы   аҭакҧхықәра зду. Ацәыргақәҵаҟны алахәцәа алшара рымоуп егьырҭ атәылақәа рҧышәа аилкаара, иара убраҟа имҩаҧысуеит аусуратә еиҿцәажәарақәагьы.

 Мақсим Ӷәынџьиа уахь ицара хықәкыс иамоуп афатә индустриаҟны иаҧхьагылоу атехнологиақәа русушьа аилкаара, иара убас европатәи аҳәынҭқаррақәа рҿы ахәҳаахәҭра аганахь ала аимадара абжьаҵара.

Ацәыргақәҵа аусура аамҭа  иалагӡаны, афонд ахада ихаҭыҧуаҩ аиҧыларақәа жәпакы мҩаҧигеит, иара убас аконтрактқәа инапы рыҵаиҩит.