Апроект «Ақәранҵыра» аусура иацҵан Хәаҧақыҭан

«Жәларбжьаратәи афонд Аҧсны» имҩаҧнаго апроект «Ақәранҵыра» 100ш. инареиҳаны инызҵыз абыргцәа ирызкуп.

Гәдоуҭа араион Хәаҧ ақыҭа инхо 111 ш. зхыҵуа Ҭина Бебиаҧҳа диит 1905 ш. рзы. Лара лгәабзиара дахашшаауам, еснагь лгәалаҟара бзиоуп, уимоу, амҵәыжәҩақәа сымазар ажәҩан ахь сҧырратәы сыҟоуп лҳәоит лышықәс дахлафаауа. Афонд амаӡаныҟәгаҩ хада Асида Инаҧшьҧҳа, аҧсуаразы ахеилак анапхгаҩы Оқтаи Ҷкотуа, арепатриациеи адемографиеи рхеилак аиҳабы Сырма Ашәҧҳа, афонд Гәдоуҭатәи ахаҭарнак Саида Кәарацхьелиаҧҳа,  афонд ахьӡала аҳамҭақәа рыманы Ҭина Бебиаҧҳа лыҩнаҭа иаҭааит.  Аҳамҭақәа рхыҧхьаӡараҿы иҟан ателевизор, иара убас агәаларшәагатә маҭәахәқәа.

«Ҳара даараӡа агәахәа алаҳхуеит абасеиҧш абыргцәа бзиақәа Аҧсны  шәахьҳамоу. Иаҳҭахуп шәара шәеиҧш згәамч ӷәӷәоу  ауаа рхыҧхьаӡара иҵегьы иацларц. Акыр шықәса шәҳагымзааит, шәажәра касышла имҩасааит! Афонд аиҳабы Сенер Гогәуа, аамҭала Аҧсны дыҟам, аха исалам шәзааҳгеит!» - иҳәеит Оқтаи Ҷкотуа, Ҭина Бебиаҧҳа агәабзиара лзеиӷьашьауа.

Ҭина Каҷа-иҧҳа хҩык аҭыҧҳацәа дрануп, фҩык амоҭацәа драндууп, амоҭа имоҭагьы дылбахьеит. Иахьа уажәраанӡа лхатә џьабаала дынхоит-дынҵуеит, анхара аус аҟны излалышо ала лҭаацәа дрыцхраауеит. Лара, Едуард Бебиа ихьӡ зху аҳәынҭқарратә акәашаратә ансамбль «Шьараҭын» аҟны аус луан, ансамбль алахәцәа рымаҭәақәа луанҭон. Аҳәаанырцәтәи атәылақәа жәпакы дырҭаахьеит. Аха, лара излалҳәо ала, Аҧсны еиӷьу џьаргьы акгьы лымбац.

«Ҳара ҳаҧсадгьыл ишахәҭоу пату анаҳзақәҵа, еиӷьу ыҟаӡам. Сгәы иалоуп ҳҿар машәырла иахьҭахо, ргәабзиара иахьамеиҷаҳауа. Ҳара аибашьра иацәынхаз жәлар маҷуп, ҳаҿиароуп. Сара сныҳәаҩуп. Ҳазшаз Анцәа ду сиашьапкуеит ҳажәлар абзиара рҧеиҧшны иҟаиҵарц, цәгьара рзааимгарц, ҳаҧсуара ҳмырӡырц. Иахьа исҭааз сысасцәа иҭабуп идуӡӡаны ҳәа шәасҳәоит, шәаҧхьаҟа шәзеигәырӷьаша рацәаны ижәбааит! » - дцәажәон зылаҧш ҳәаа ахара инаӡоз абырг Ҭина Бебиаҧҳа.

Ҭина Бебиаҧҳа, еиуеиҧшым ачымазарақәа ҧсыуа хәшәыла илхәышәтәуеит, аҭәҳәақәа ҟалҵоит, ақыҭаҿы ныҳәаҩыс ирымоу лара лоуп.

«Сықәра амаӡақәа ируакуп гәыла амажәра, еснагь алахҿыхра. Сыуаажәлар срықәныҳәоит. Аҧсуа жәлар ҳахьӡ адунеи иалаҵәо Анцәа ду иҟаиҵааит!» -абас лныҳәаҧхьыӡқәа еиқәтәара рықәмызт згәашьамх ӷәӷәоу, зыхшыҩ цҳафыруа иҟоу, алафҳәара бзиа избо Ҭина Каҷа-иҧҳа Бебиа.

Subscribe to Syndicate