Апроект «Ани амаалықьи» нагӡоуп Уарча ақыҭа

Уарча ақыҭа инхо Шьақаиа Ҭымыри, Габниаҧҳа Светланеи ахшара рацәа змоу аҧсуа  ҭаацәароуп. Иахьа, ари аҭаацәараҿы ҩаҧхьа гәырӷьаран. Диит а-13-тәи асаби, Мадлена хәыҷы.  Мадлена хәҩык аишьцәеи, быжьҩык аиҳәшьцәеи лымоуп: Санта, Саманта, Сабина, Сабрина, Саида, Саид, Сантана, Алексеи, Гудиса, Алмас, Амина, Леон.

«Жәларбжьаратәи афонд Аҧсны» имҩаҧнаго еснагьтәи апроект «Ани амаалықьи» аҳәаақәа ирҭагӡаны, ҷыдала арҭ аҭаацәа рзы ирхиан аҳамҭа. Мадлена лыхьӡала еиқәыршәаз ашәыра еиднакылоит лара  лааӡараҿы лан лхы иалырхәаша амаҭәахәқәа, ацәымҳақәа инадыркны ашәҵатәқәа рҟынӡа.

«Даараӡа ҭабуп ҳәа шәаҳхәоит ҳгәырӷьара ахьҳацеиҩышәшаз,  ҳхы иаҳархәаша аҳамҭақәа ахьҳанашәшьаз. Уажәшьҭа сыхшара духеит, исыҵагылеит, аҩнтәи аусқәа зегьы рҿы исыцхраауеит»-ҳәа азгәалҭеит 13-ҩык ахшара ран Светлана Габниаҧҳа, афонд аџьшьара аҭо.

Ииашаҵәҟьаны, ас еиҧш аизҳара ахьыҟоу аҧсуа ҭаацәарақәа рыӡбахә узеигәырӷьаша хҭысуп. Хымҧада, уи азгәаҭаны досу излаилшо ала адгылара аныҟаиҵа, ҳҳәынҭқарреи ҳажәлари рҧеиҧш азы иуасхыруп.