Аҧсны Ахада Иорданиатәи аделегациа идикылеит

Иахьа, Аҧсны Аҳәынҭқараа ахада Рауль Ҳаџьымба идикылеит Иорданиа иҟоу Хашимиттәи Акралра апрламент адепутатцәа Мансур Сижьажь, Халед Алабдалла, Халед Албаккар. Аиҧылара иалахәын Аҧсны Жәлар Реизара аиҳабы Валери Кәарҷиа, апарламент адепутат, «Жәларбжьаратәи афонд Аҧсны» алахәыла Асҭамыр Логәуа, «Жәларбжьаратәи афонд Аҧсны» ахада ихаҭыҧуаҩ Мақсим Гәынџьиа.

Аҧсны Аҳәынҭқарра Ахада, Иорданиатәи аделегациа ҳтәылаҿы рыҟазаара гәахәала идикылеит.

«Иорданиеи Аҧсни рыбжьара аиҩызареи аусеицуреи рҳәаақәа рыҽдырҭбаауеит ас еиҧш иҟоу аимадарақәа ирыбзоураны. Ҳара ҳтәылақәа еидҳәалоуп ҭоурыхла, избанзар хыҧхьаӡара рацәала ҳдиаспора Иорданиа инхоит, аҳәынҭқарра аҭоурыхи акультуреи ирыхәҭакны иҟоуп» - иҳәеит атәыла Ахада.

Ахәҭакахьала, Иорданиатәи аделегациа ҳтәыла Ахада иҭабуп ҳәа иарҳәеит иҟаиҵаз адкыларазы, насгьы иазгәарҭеит Аҧсны аҭоурыхтә аамҭа уадаҩ ианысны аҿиара мҩа ишану. Агәыӷра аадырҧшит, Жәларбжьаратәи аилазаара азин нагӡа аманы аҧхьаҟа ишалало ала.

«Ҳара Иорданиа ҳахьнеиуа, зегь раҧхьаӡа иргыланы ҳалацәажәоит Аҧсны азҵаара. Раҧхьатәи ашьаҿақәа ҟаҵоуп, аҧхьаҟа иҵегьы иацҵахап ҳәа агәаанагара сымоуп. Ишәымоу Аиааира нагӡара ақәзааит!» - ҳәа азгәеиҭеит хылҵшьҭрала иадыгоу, Иорданиатәи апарламент адепутат Мансур Сижьажь.

Аиҧылара ахыркәшамҭазы, Аҧсны Аҳәынҭқарра Ахада Рауль Ҳаџьымба, асасцәа амҳаџьырра аҭоурых зҳәо асахьа ҳамҭас иранеишьеит.

Анаҩс, аҧшәмацәеи асасцәеи аҭааит ахҵәара иақәшәаз ҳауаажәлар рыхьӡала Амшын Еиқәа аҿықә аҟны игылоу абаҟа.

«Иазгәаҭатәуп, Иорданиатәи аделегациа ҳтәылахь раара шалыршахаз, арҭ ашықәсқәа ирылагӡаны «Жәларбжьаратәи афонд Аҧсны» Сенер Гогәуа зхадараҿы дыҟаз аделегациа ҳдиаспора ахьынхоз атәылақәа рҿы имҩаҧыргоз аныҟәарақәеи, аимадарақәеи, аиҿцәажәарақәеи ирыбзоураны» - ҳәа азгәеиҭеит Мақсим Ӷәынџьиа ажурналистцәа аниҿцәажәоз.