Аҧсны ахада Рауль Ҳаџьымба аизара мҩаҧигеит Очамчыреи, Тҟәарчали, Гали иҟоу ареабилитациатә центрқәа реиқәырхаразы

Embedded thumbnail for Аҧсны ахада Рауль Ҳаџьымба аизара мҩаҧигеит Очамчыреи, Тҟәарчали, Гали  иҟоу ареабилитациатә центрқәа реиқәырхаразы

«Жәларбжьаратәи афонд Аҧсны» аҧшьгарала иаҧҵан аусуратә гәыҧ ДЦП ачымазара иадҳәалоу азҵаарақәа рыӡбареи, Очамчыреи, Тҟәарчали, Гали иҟоу ареабилитациатә центрқәа рыхьчареи ирызкны. Уи еҿыркааит «Жәларбжьаратәи афонд Аҧсны», афонд «Ашана», агәабзиарахьчара аминистрра -Аҧсны аҳәынҭқарра ахәыҷтәы ҳақьым хада Абыхәба А.Ф. хаҭарнакра ззылуа, иара убас жәларбжьаратәи аиҿкаарақәа  World Vision и UNIСEF рхаҭарнакцәа.  Иҳаҩсыз амчыбжь азы аусуратә гәыҧ ахаҭарнакцәа рхатә аҧшьгарақәа рыманы Аҧсны ахада Рауль Ҳаџьымба иҭааит. Аделегациа ргәаанагара даназыӡырҩ ашьҭахь, атәыла ахада аиҳабыра адҵа риҭеит ари азҵаара иадҳәалоу ауадаҩрақәа ҭырҵаарц, рхатәы згәаҭақәа алыркаарц ареабилитациатә центрқәа реиқәырхаразы, аусутә гәыҧ алахәцәа ракәзар, ацентрқәа ирыдҳәалоу асмета аздырхиарц.

Иацы, абҵарамза 8 рзы, аҳәынҭқарра ахада Рауль Ҳаџьымба имҩаҧигаз аизара иалахәын аҧыза-аминистр Барцыц Б.К, уи ихаҭыҧуаҩ, афинансқәа рминистр СериковД.Н, агәабзиарахьчара аминистр ихаҭыҧуаҩ Ҵахнакиа Ҭ.М, ДЦП азҵаарақәа рзы аусуратә гәыҧ ахаҭарнакцәа. Уаҟа иалацәажәан зыӡбахә ҳәоу ареабилитациатә центрқәа реиқәыхара ҭагылазаашьас иамоу. «Жәларбжьаратәи афонд Аҧсны» ахьӡала аизара далахәын афонд амаӡаныҟәгаҩ хада Асида Инаҧшьҧҳа.

Аизара аартуа атәыла ахада Рауль Ҳаџьымба иазгәеиҭеит, ахраионк рҿы аус шыруз зхы иамыхәо ахәыҷқәа рзы ареабилитациатә центрқәа, урҭ ирыдҳәалаз ахарџь ахахьы ишыргоз жәларбжьаратәи аиҿкаарақәа World Vision и UNIСEF.

«Жәларбжьаратәи аиҿкаарақәа рыпрограмма анхыркәшаха анаҩс, арҭ ацентрқәа афинанстә цхыраарада  иаанхоит. 600-ҩык инареиҳаны ахәыҷқәа иахәҭоу ацхыраара рмоуа иҟалоит. Убри аҟынтә иаҧҵатәуп иахәҭоу апрограмма , жәларбжьаратәи аиҿкаарақәа имҩаҧыргоз аусура иацызҵаша. Ҳара ареабилитациатә центрқәа раркра ҳалшаӡом, ахәыҷқәа зҿлымҳарада иаанҳажьыр ҟалаӡом»-ҳәа азгәеиҭеит Рауль Ҳаџьымба.

«Жәларбжьаратәи афонд Аҧсны» амаӡаныҟәгаҩ хада Асида Инаҧшьҧҳа илҳәеит, згәабзиара уашәшәыроу ахәыҷқәа ирызку апрограмма ашьақәыргылара рнапы шадыркыз афонд  анаҧҵаха амш инаркны.

 «»Жәларбжьаратәи афонд Аҧсни» афонд «Ашанеи» еицымҩаҧыргоз аусура инақәыршәаны, ӷәӷәала ичмазҩыз ахәыҷқәа рыхәышәтәра идәықәырҵон Урыстәыла, Ермантәыла. Иара убас аҳәаанырцәынтәи Аҧсныҟа ааҧхьара рырҭон аҳақьымцәа, урҭ ахәыҷқәа хәыда-ҧсада игәарҭон, аҳақьымцәеи аметодистцәеи рзы асеминарқәа мҩаҧыргон. Арҭ азҵаарақәа еиҳа инарҵауланы ианыҭҵааха анаҩс, астатистика анеилкааха,  агәаанагара цәырҵит ари атема аӡбара аус аҟны зегьы ҳамчқәа шеидҵатәу ала. Убас ауп ишиз ДЦП иазкны аусуратә гәыҧ аилазаара.  Раҧхьатәи алҵшәақәа азгәаҭоуп,  UNICEF-и ҳареи ҳаицхырааны Ареспубликатә реабилитациатә центр аҟны иаартуп асурдоуада. «Жәларбжьаратәи афонд Аҧсны»  ацхыраара рынаҭоит Аресубликатә, иара убас араионтә центрқәа. Аха уи еснагьтәым, аамҭалатәуп. Ас еиҧш зхы иамыхәо  аҳәыҷчымазцәа еснагьтәи ахылаҧшра рҭахуп. Ус еиҧш иҟоу ацхыраара роур ҟалоит аҩны, иахьынхоу  атыӡҭыҧ аҿы, уи иазку аусбарҭақәа рҟны, урҭ еиҭашьақәыргылан жәларбжьаратәи аиҿкаарақәа World Vision и UNICEF рыбзоурала. Уажәшьҭарнахыс аҳәынҭқарра ацхыраара ада, арҭ ацентрқәа реиқәырхара уадаҩхоит»-ҳәа азгәалҭеит Асида Инаҧшьҧҳа.

World Vision асоциалтә программа аменеџьер Рита Басариаҧҳа иазгәалҭеит, реабилитациатә центрк аныҟәгара мызкы ишартәо 150 нызқь мааҭ аҧара, хцентрк рныҟәгара 450 нызқь мааҭ аҭахуп.  Убри аан иазгәаҭатәуп,  Галтәи араион администрациа иахьатәи аамҭазы 30 % ахарџь ахахьы ишаго аҭыҧантәи ареабилитациатә центр аусура аҳәаақәҵаразы.

Аҧсны ахада Рауль Ҳаџьымба идҵала, аиҳабыра адҵа рыҭан иааиуа 2017 ш. аабиуџьет аҟны иазгәарҭарц  ареабилитациатә центрқәа  рныҟәгара иадҳәалоу ахарџь.