Аҧснытәи аделегациа усуратә визитла аҳәаанырцә иҟан.

Арҭ амшқәа рзы Аҧснытәи аделегациа усуратә визитла Египет, Иорданиа, Ҭырқәтәыла инхо ҳдиаспора ирҭааит. Аделегациа аилазаараҟны иҟан: Беслан Быҭәба-аҳәаанырцәтәи атәылақәеи Аҧсни рыбжьара аекономика-хәаахәҭратә еимадарақәа рзы ҳтәыла  ахада ихаҭарнак, Сенер Гогәуа- ауаажәларратә еиҿкаара «Жәларбжьаратәи афонд Аҧсны» ахада, Дмитри Аргәын- абизнесмен, Сириантәи Аҧсныҟа нхара ихынҳәыз ҳџьынџьуаҩ, аҳақьым Надир Ҳагәыш.

Аделегациа ахықәкы хадақәа ируакын аҳәаанырцә инхо ҳдиаспореи  ҳареи ҳаимадара арӷәӷәара, еиуеиҧшым ахырхарҭақәа рыла аҧхьаҟа аусеицура. 

Ҳделегациа рныҟәарақәа хацыркын Египет ала.   Ари атәылаҿы, Кавказ ажәларқәа рхаҭарнакцәа нхоижьҭеи уажәшьҭа 600 шықәса ҵуеит. Каир ақалақьи, уи акәша-мыкәша инхо аҧсуаа рхыҧхьаӡара 25 нызқь рҟынӡа инаӡоит.  Рыцҳарас иҟоу  урҭ рахьтә, аӡәгьы аҧсшәеи, рыжәлақәеи рыздырӡом. Зегь еицҿакны ирҳәо жәла заҵәык ауп «Абаза».

Сенер Гогәуа излаиҳәо ала, хымш, Египет рыҟазаара иалагӡаны акыр аиҧыларақәеи, ауснагӡатәқәеи еиҿыркааит.

«Аизарақәа зегьы рҟны, Аҧсны аполитикатә, асоциал-економикатә, акультуратә, аҵара-дырратә  ҭагылазаашьа уҳәа азҵаарақәа жәпакы ҳрылацәажәеит. Египет инхо ҳдиаспора, Аҧсны аганахь ала, аинформациа ҳәа акагь рымаӡам. Ҳара иҟаҳҵаз аҳәарала,  уаҟа еиҿкаан Кавказ ажәларқәа рхаҭарнакцәа еидызкыло аизарҭатә ҭыҧ. Хадасгьы далхын, зықәрахь инеихьоу абырг,  Рауф Абаза»-ҳәа азгәеиҭеит Сенер Гогәуа.

Аҧснытәи аделегациа Египет рыҟазаара иалагӡаны,  акультуреи, аҵарадырреи, аспорти ирыдҳәалоу азҵаарақәа инарҷыданы, аекономика-инвестициатә усқәа рыҿиара иазкыз аиҧыларақәа жәпакы мҩаҧыргеит.

«Ҳара ааҧхьара ҳаман Египет иҟоу Китаитәи ааглыхратә наплак ду  «Теда» ашҟа. Ҳрылацәажәеит Китаитәи, Египеттәи  атауарқәа  Аҧснынтә Урыстәылаҟа рышьҭра, Аҧсны транзиттә коридорны аҟалара, иара убас  Китаитәи ааглыхратә  центр араҟа аиҿкаара. Аиҧылара ҳаман аинвестициатә усбарҭа «Г-ком» ахаҭарнак Небиль  Ель Гоҳари ҳареи. Ҳрылацәажәеит апроектқәа маҷымкәа. Египет инхо ҳдиаспора рхаҭарнакцәеи, абизнесменцәеи Аҧсныҟа иааҳаҧхьеит, иаарласны иаараны иҟоуп»-ҳәа азгәеиҭеит Гогәуа.

Аҧснытәи аделегациа Египет рыҟазаара акыр иахаҵгылеит уа инхо ҳџьынџьуаа Дина Абаза, Муҳаммед Абаза.

Египетынтә Аҧснытәи аделегациа рымҩа хан Иорданиаҟа. Уа инхо  апсуаа рхылҵшьҭрақәа уи атәылахь инанагеит 1830-1840 шықәсқәа рзы.  Кавказ ажәларқәа рхыҧхьаӡара 250 нызқь рҟынӡа инаӡозар, урҭ рахьтә ҳаҧсыуаауп зҳәо 20 нызқьҩык ыҟоуп.

«Иорданиа инхо ҳдиаспора, Египет инхо ҳауаажәлар ирыҿҳарҧшуазар, даҽа ҭагылазаашьак рымоуп. Урҭ ирдыруеит рыжәла, иҟоуп маҷк акәзаргьы зхатәы бызшәа зҳәо. Аус ауеит дара еидызкыло ауаажәларратә еиҿкаара «Диван-абаза».  Уи еиҳабыс дамоуп Ҳасан Чычба.  Имҩаҧысит ҳдиаспореи ҳареи ҳаиҧыларақәа. Аҧсны аҭоурыхи, иахьатәи аҭагылазаашьеи ирызкны ажәабжьқәа раҳҳәеит.  Ҳазҧылақәаз рахьтә иҟан хылҵшьҭрала иаҧсацәоу, еиуеиҧшым аҳәынҭқарратә маҵзурақәа рҟны аус зуа, иаҳҳәозар,  аинралцәа, апарламент адепутатцәа, абизнесменцәа, Аҧсны адәныҟатәи аусқәа рминистрра ахаҭарнакс Иорданиа иҟоу Ашьраф Абаза-Чқәуа уҳәа  аӡәырҩы»-иҳәеит Сенер Гогәуа.

Аҧснытәи аделегациа Иорданиа идикылеит апринц Хәсеин Мырза. Иара,  аҳ Хәсеин раҧхьатәи имоҭа иоуп. Ирылацәажәеит еиуиҧшым азҵаарақәа. Аҧснытәи аделегациа иҟарҵаз ааҧхьарала, иаарласны апринц иҩызцәеи, уа инхо ҳдиаспореи ҳтәыла иаҭаараны иҟоуп.

«Иорданиа, ҳара ҳаҭааит   Ҭырқәтәылатәи аконсулра. Уа консулс аус зуа, Седаҭ Иунал, злеилаҳкааз ала, хылҵшьҭрала даҧсыуоуп.

 Иара убас ҳаҟан, Иорданиа иҟоу  Урыстәылатәи ацҳаражәҳәарҭаҿы. Уи ахаҭарнак Борис  Болотин, Иорданиаҟа   ҳаара ахықәки, Аҧсны аҭагылазаашьеи рзы аинформациа иаҳҭеит. Убра ҳшыҟаз ауп, Египет, Урыстәыла атәылауаа зҭаз аҳаирплан анкаҳазгьы. Уи ахҭыс гәалсрала ишҳадаҳкылаз иаҳҳәеит»-ҳәа азгәеиҭеит  «Жәларбжьаратәи афонд  Аҧсны» ахада Сонер Гогәуа.

Аҧснытәи аделегациа Иорданиаҟа рцара аус адгылара анаҭеит,  Иорданиа иҟоу апринц Али иусбарҭаҟны аус зуа аҧсуаа Иунал Ҳаҭхәа, Енвер Чқәуа, Маџьҭы  Қьешьҭ.  Иунал Ҳаҭхәа, Иорданиа иҟоу «Жәларбжьаратәи кавказтәи акультуратә академиа» напхгаҩыс дамоуп.  Иаарласны иазгәаҭоуп, «Жәларбжьаратәи афонд Аҧсни»  «Жәларбжьаратәи кавказтәи акультуратә академиа» рхадацәа, аҧхьаҟа русеицуреи реиҩызареи рзы аиқәышаҳаҭра анапы аҵаҩра.

 Иорданиа, иара убас, аекономикеи, ахәаахәҭреи рганахь ала, Аҧснытәи аделегациеи абизнесменцәеи злахәыз акыр аиҧыларақәа мҩаҧысит.  Дара аҭааит аинвестициатә усбарҭа дуқәа ируакыу «Боливер-Гроуп». Уаҟагьы аицәажәарақәа мҩаҧыргеит.

Иазгәаҭатәуп, араб тәылақәа зегьы ахәаахәҭра шымҩаҧырго Иорданиантә. Ари атәылаҟны аҭынчреи аҭышәынтәалареи шьақәгылоуп. Аус руеит абанктә системеи, ахьчаратә ҧгаҧсеи.  Хымҧада, Аҧсныи Иорданеи ари ахырхарҭала русеицзура анзалыршаха, ҳтәыла аекономикатә ҿиаразы акыр ицхыраагӡахоит. 

 Аҧснытәи аделегациа Египети, Иорданиеи русуратә визит хыркәшаны, қәҿиарала ихынҳәит Аҧсныҟа. Анаҩс, аделегациа алахәцәа руаӡәк, Сенер Гогәуа, Ҭырқәтәыла имҩаҧысуаз Аҧсуа Федерациа ахада иалхрақәа ирызкыз аизара ихы алаирхәит.