«Аҧсуаа рполитикатә ҭагылазаашьа аҭоурых» ашәҟәы аӡыргара мҩаҧысит

Иахьа, Аҧсадгьыл ахь архынҳәразы аҳәынҭқарратә еилакы ахыбраҿы имҩаҧысит, Ҭырқәтәыла инхо ҳџьынџьуаҩ, Сельчуқ Сымсым авторс дызмоу, а-19-тәи, а-20-тәи ашәышықәсақәа  ирыҵаркуа  «Аҧсуаа рполитикатә ҭагылазаашьа аҭоурых»  иазку ашәҟәы аӡыргареи, ахцәажәареи. Уи рхы аладырхәит ауаажәларратә, аҳәынҭқарратә усзуцәа, аҵарауаа, аҭоурыхҭҵааҩцәа, «Жәларбжьаратәи афонд Аҧсны» ахаҭарнакцәа.

Сельчуқ Сымсым диит Голландиа, иахьа дынхоит Ҭырқәтәыла. Иара дхәыҷы аахыс дазҿлымҳауп аҧсуаа  рҭоурых, рҵас, рқьабз. Занааҭла дырҵаҩуп, аха аҭоурых ахь имоу абзиабара иабзоураны, еиуеиҧшым ахыҵхырҭақәа ихы иархәаны аҭҵааратә усумҭақәа реидкылара инапы алакуп. «Аҧсуаа рполитикатә ҭагылазаашьа аҭоурых»  ашәҟәы ҭырқәшәала иҭыжьуп, англыз бызшәала аиҭагара иаҿуп. Ари раҧхьатәи томуп, зынӡа фтомк ҭыҵраны иҟоуп. Автор 15 шықәса инеиҧынкыланы урҭ реиқәыршәара даҿын.

«Сара схәыҷы аахыс аҧсуара бзиа избон. Аиҳабацәа рҿаҧыцтә ҳәамҭақәа еидыскылон, иҭазыҩуан. Аҧсуара бзианы излаз абырг, Аллиаҭин Агрба, саниҿцәажәоз ииҳәаз ажәақәа сгәалашәоит: «Сара  саб илаз аҧсуара абжа еиҭабжагьы сылам…». Аиаша шәасҳәап, уи ансаҳа сцәа сҭанарӡыӡааит, иагьабжьызгеит аҭҵаара аус снапы аласкырц.  Аҭоурых ашьҭа ҳмырӡроуп, уи ҳара иаҳҿахәҳәагоуп. Аҧхьаҟа иҟаҵатәу акырӡа ирацәоуп»-ҳәа азгәеиҭеит Сельчуқ Сымсым.

 Ашәҟәы аӡыргара зхы алазырхәыз зегьы ҭабуп ҳәа иарҳәеит Сельчуқ Сымсым аҵакы ӷәӷәа змоу, аџьабаа зцу иус азы, рыӡбахә ҳәан ацхыраара, адгылара изҭаз зегьы.

«Сельчуқ Сымсым, абас еиҧш агәаҳәара изҭаз, имилаҭи иҭоурыхи рахь имоу агәыбылроуп, абзиабароуп. Ари ашәҟәы  уасхыруп аҭҵаара аус знапы алаку,  аҧхьаҟа уи аҿиара амҩа ианызҵо ауаа рзы. Ашәҟәы имариоу, иласу бызшәала иҩуп. Хымҧада,  уи аҧхьаҩ бзиа ибаны идимкыларц залшом»-ҳәа азгәеиҭеит аӡыргаратә хәылҧазы мҩаҧызгоз, «Жәларбжьаратәи афонд Аҧсны» аҧсуара ахеилак анапхгаҩы Оқҭаи Ҷкотуа.

 

Subscribe to Syndicate