Ауаажәларратә усзуҩ Нугзар Ашәба, аҧсуа қьабзқәа реиқәырхазы игәаанагара.

Ҳара изаҳҭахузеи аҳәынҭқарра?  Изаҳҭаху акызаҵәык ауп: ҳажәлари, ҳҳәынҭқарреи, ҳбызшәеи, ҳкультуреи, даҽакы иаламҩашьо ҳмилаҭ ахаҿреи еиқәҳархарц. Амал, даҽа ҳәынҭқаррак аҿгьы арҳара алшоит. Аҧсуа жәлар иӷәӷәоу аҳәынҭқарра рымазароуп.  Лассы-лассы иалацәажәалатәуп аҧсуара ицәырнаго азҵаарақәа. Уи ажәлар ирыларҵәалатәуп.  Уахи ҽни ҳаиҳабацәа, ҳанацәа, ҳабацәа иныҟәыргоз,  иаҳцәыӡқәаз, ажәытәра иагақәаз ыҟоуп. Ииашоуп, аҧсҭазаара ҧхьаҟа ицоит, ҳацныҟәароуп.  Аха, иҳамоу аихаҳара ҳалҳаршароуп, ацәқәырҧақәа ҳаҽрыҳамҭароуп. Аҳәынҭқарратә ҩаӡара аҟынӡа инаганы, иҟоу аинститутқәа ҳхы иархәаны, ҳҵарауаа ҳарзыӡырҩны, аматериалқәа еиқәыршәаны, ҭцаара-дыррала ҳазнеины,  имыӡырц ашәҟәқәа ирнаҳҵароуп. Аҧсуа қьабз, аҧсуа хымҩаҧгашьа, ган рацәала ҳазнеироуп, ҳабиҧарақәа ирымаҳдароуп. Досу ҳаҩнаҭақәа рҿы иазгәаҳҭалароуп.  Ҳқьабыз иацәтәыму аҟазшьақәа ҳадҳамкылароуп.  Ҳара ҳанхәыҷқәаз, абыргцәа ахьтәаз раҧхьа ҳаиасны ҳцаӡомызт, аҧсшәа раҳҳәарц азы ҳнапы рхха ираҳҭаӡомызт. Аихаҵгылара, апатуеиқәҵара, аихӡыӡаара  ыҟан. Аҧсуа бызшәа амацара инхар акагьы иаҧсаӡам, аҧсуа қьабз ацымкәа. Иара убас, аҧсуа қьабзгьы акагьы иаҧсаӡам, аҧсшәа ацӡамкәа.  Дара дара хеибарҭәаароуп, еицызароуп, еиҟәыҭхашьа амаӡам, аус адулатәуп.    Иҳалшоузеи иахьа иҳамоу аҟынтәи иҳахьчарц?  Иаҳцәыӡыз иарбану,  иаҳцәыӡран иҟоу ҳдыруама? Урҭқәа зегьы ҭҵаарадыррала ҳазнеироуп.  Руак иадымхаргьы ианаҳзеиқәырха,  аҧсҭазаара аларҵәара анҳалҳарша, ҧхьаҟа анҵыра  маиурц залшом.  Ҳмилаҭ ахаҿра ҳахьчароуп, ҳкультура ашәарҭара иҭаҳмыргылароуп. Аҧсуа ахдырра ҳаракы аарҧшны, илшо зегьы ҟаиҵароуп иаҧсуара аиқәырхаразы. Аиҳабацәа,  ҳнаҩс иааиуа аиҵбацәа аҿырҧшы бзиақәа дҳарбароуп, иҳааӡароуп, амҩа иаша иқәаҳҵароуп.