ДЦП ачымазара змоу ахәыҷқәа раҧхьатәи агәыҧ, иахьа, Ермантәылаҟа амҩа иқәлеит аҽыхәышәтәразы.

Ауаажәларратә еиҿкаара «Жәларбжьаратәи афонд Аҧсныи»  акультура-гәыҳалалратә фонд «Ашанеи», Аҧснынтә Ермантәылаҟа аоперациа аҟаҵара  идәықәырҵеит  ДЦП ачымазара зыхьуа ахәыҷқәа раҧхьатәи агәыҧ:. Уи аилазаараҟны иҟоуп:  Асҭамыр Занҭариа-8ш,  Амина Бигәааҧҳа-12ш,  Азамаҭ Ҷкотуа-12ш, Лиана Гәдалиаҧҳа-21ш. Ахәыҷқәа рыхәышәтәразы аҧҟара мҩаҧигоит Ермантәылатәи Ареспублика ахәыҷтәы ҳақьым-травмотолог.

Ас еиҧш иҟоу ауснагӡатә  еиҿкаауп «Жәларбжьаратәи афонд Аҧсныи» акультура-гәыҳалалратә фонд «Ашанеи» еицырзеиҧшу апроект инақәыршәаны.

Аҧснынтә ҧшьҩык ахәыҷқәа иаалырҟьаны аоперациа рзыҟаҵара шаҭахыз рҳәеит, иун мзазы  Аҟәатәи ахәыҷтәы поликлиникаҿы ДЦП ачымазара зыхьуаз ахәыҷқәа рыдкылара хәыда-ҧсада имҩаҧызгоз Ермантәылатәи Ареспублика ахәыҷтәы ҳақьымцәа. Ермантәыла иалкаау амедецинатә усбарҭақәа рҟны аус зуа аҳақьымцәа Аҧсныҟа раара алыршахеит  «Жәларбжьаратәи афонд Аҧсны» абзоурала. Урҭ ара рыҟазаара иалагӡаны, 300-ҩык ахәыҷқәа агәаҭарақәа ирыхрыжьит. Иҟарҵеит рхатә алкаақәа, ирҳәеит иаарласӡаны аортопедиатә ҧҟара зҭаху ахәыҷқәа рыӡбахә.  Убри инақәыршәаны,  «Жәларбжьаратәи афонд Аҧсныи» акультура-гәыҳалалратә фонд «Ашанеи» ахәыҷқәа рыхәышәтәра иадҳәалаз ахарџьқәа рхахьы иргеит, аҽыхәышәтәра иахысуеит Еревантәи амедицинтә центр аҟны. Ахәыҷқәа анҧырҟалак анаҩс,  рҭаацәеи дареи ҩымчыбжьа уа иҟазаауеит. Аҳәыҷқәеи аҭаацәеи Ермантәылаҟа ирыццеит афонд «Ашана» адиректор Џьевеира Колосовеи, «Жәларбжьаратәи афонд Аҧсны» асоциалтә политика аҟәша анапхгаҩы Иулиа Гәымҧҳаи.

Ҳарҭ, ахәыҷқәа ирзеиӷьаҳшьоит иаарласны ргәабзиара шьақәыргыланы, игәырӷьаҵәа рыҩныҟақәа ихынҳәырц. 

Subscribe to Syndicate