Имҩаԥысит Астол гьежь: «Амассатә информациа ахархәагақәа - ақьабзқәеи, аҿыц аԥшьгарақәеи рыбжьара, ҳаамҭазтәи ауаажәларреи, аетнокультуреи»

Имҩаԥысит Астол гьежь: «Амассатә информациа ахархәагақәа -ақьабзқәеи, аҿыц аԥшьгарақәеи  рыбжьара, ҳаамҭазтәи ауаажәларреи, аетнокультуреи»

Иахьа, Аԥснытәи аҳәынҭқарратә университе аҿы имҩаԥысит «Жәларбжьаратәи афонд Аԥсни» ауниверситети еицымҩаԥыргаз  Астол гьежь абри атема ала: «Амассатә информациа ахархәагақәа -ақьабзқәеи, аҿыц аԥшьгарақәеи  рыбжьара, ҳаамҭазтәи ауаажәларреи, аетнокультуреи».  Уи азкуп Аԥснытәи аҳәынҭқарратә университет 85 ш. ахыҵра.

Астол гьежь рхы аладырхәит Урыстәылатәи Афедерациа, Ҭырқәтәылатәи Ареспублика  аҵарауаа, Аԥснытәи ауниверситет арҵаҩцәа, амассатә информациа ахархәагақәа рхаҭарнакцәа, ажурналистцәа.

Астол гьежь ааиртит  «Жәларбжьаратәи афонд Аԥсны»  амассатә информациа ахархәагақәеи ауаажәларреи реимадаразы ахеилак анапхгаҩы, Аԥснытәи аҳәынҭқарратә университет ажурналистика акафедра аиҳабы  Гурам Амқәаб.  Уи дазааҭгылеит Астол гьежь ахықәкы: «Аҳәынҭқаррақәа рырҿиара шьагәыҭс иамазароуп амилаҭ культура аҭоурыхтә ԥышәа.  Атема актуалра адҳәалоуп аглобализациатә  процессқәеи, урҭ ирыцу атенденциақәеи. Уи аҟны аҭыԥ хада ааннакылоит амассатә информациа ахархәагақәа. Убри аҟынтә иахьа иазгәаҭазарц ахәҭоуп уи аҿиара иамоу аихьӡарақәа, иара убас ауаажәларра аҟны иааннакыло аҭыԥи  ахаҭареи»-ҳәа азгәеиҭеит Гурам Амқәаб.

Асасцәа «Бзиала шәаабеит!»-ҳәа раҳәо дырԥылеит Аԥснытәи аҳәынҭқарратә университет аректор Алеко Гәарамиа. Иара еизаз ирзеиҭеиҳәеит ауниверситет аҭоурых, аибашьра ашьҭахь аҭагылазаашьа уадаҩ амазаргьы, иахьа аҿиара мҩа ишану. Уи аҟны адгылара шанаҭо Урыстәылатәи Афедерациа. Аԥснытәи аҳәынҭқарратә телехәаԥшреи ауниверситети аамҭаказы ишеициз.

«Даара ихҭыс дууп иахьа Аԥснытәи аҳәынҭқарратә университет аҿы имҩаԥысуа аус.  Ибзианы иаҳдыруеит ҳаԥхьаҟа зыӡбара аҭаху азҵаарақәа рацәаны ишышьҭоу,  уи аҟны ахатә ҭыԥ ааннакылоит ажурналистика. Ҳара ҳимилаҭ ԥхьаҟа аҿиара иаҿуп, ажәлар ииашоу аинформациа рызнагараҿы  ажурналист иҭакԥхықәра рацәоуп»-иҳәеит  аиԥылараҿы академик Алеко Гәарамиа.

«Жәларбжьаратәи афонд Аԥсны» ахада ихаҭыԥуаҩ Мақсим Ӷәынџьиа дазааҭгылеит афонд еиуеиԥшым ахырхарҭақәа рыла аус шауа, Астол гьежьқәа шеиҿнакаауа. Ҳазҭалаз ашықәс ҿыц азы ари раԥхьатәи шакәу, афонд аԥхьаҟагьы ас еиԥш иҟоу аусқәа шҳәаақәнаҵо. Урыстәылеи Ҭырқәтәылеи  Аԥсни реизыҟазаашьа ишазҿлымҳау, реимадаразы аусқәа шиеҿнакаауа.

 Урыстәыла иҭыҵуа ажурнал «Вопросы философии» аредактор хада Борис Пружинин  Аԥсныҟа иаара гәахәас иҟаҵо иазгәеиҭеит:

«Адунеи аҿы имҩаԥысуа ахҭысқәа аамҭа азҿлымҳара анаҭароуп. Аԥсны иамоуп зқьышықәсалатәи аҭоурых.  Ҳҿаԥхьа иқәҳаргылап азҵаара: « Ҳабацои, иарбан мҩоу илаҳхуа? Ҳдоуҳатә беиарақәа шԥахьчатәу? Уи аҟны ҭыԥс иааныркылои амассатә информациа ахархәагақәа? Абарҭқәа зегьы ирыцәхьамҵкәа аус утәуп»-иҳәеит Астол гьежь амҩаԥгаҩцәа ируаӡәкыз Борис Пружинин.

Ажәахә ҟазҵоз аҵарауаа ган рацәала иазнеит атрадициатә культура ауаажәларра реидкылараҿы ҭыԥс иааннакыло, амедиатә еилазаара апроблемақәа реиҭарҿиара ахырхарҭа, адиаспора аҩныҵҟа амилаҭтә культура арҿиара аус аҟны амассатә информациа ароль, амедиакультура аԥсуа қьабзқәа рконтекст аҿы.

Subscribe to Syndicate