Иорданиа инхо ҳџьынџьуаа Аиааира амш азгәарҭеит

Embedded thumbnail for Иорданиа инхо ҳџьынџьуаа Аиааира амш азгәарҭеит

Аҧсны Аџьынџьтәылатә еибашьраҿы игаз Аиааира амш 24 ш. ахыҵра аҳаҭыразы, Иорданиа аҳҭны қалақь Амман имҩаҧысит ҳџьынџьуаа  злахәыз аныҳәатә хәылҧазы.

Ауаажәларратә еиҿкаара «Жәларбжьаратәи афонд Аҧсни» амилаҭ дыгатә телерадиоеилахәыра «Нарҭи» русеицуразы Аҧсны ирыбжьарҵахьаз аиқәшаҳаҭра инақәыршәаны, раҧхьатәи апроект хацыркын  Иорданиа,  Аиааира амш ныҳәа ду амҩаҧгарала. Аныҳәатә хәылҧазы  аҧсышәала иаалыртит афонд аусзуҩ Жанна Леиҧҳа.

Анаҩс, ахәылҧаз аҿы иқәгылеит  Кавказ ажәларқәа Реидгыла ахаҭарнакцәа. Урҭ ражәахәқәа рҿы инаҵшьны иазгәарҭон Аиааира амш ҵакыс иамоу Аҧсны Аҳәынҭқарра аҿиареи ашьақәгылареи рҿы, иара убас зџьынџь дгьыл иаҟәыгоу ҳашьцәа рҭоурыхтә ҧсадгьыл радыҧхьалара аҟны. Даара зҿлымҳарыла иазнеит «Жәларбжьаратәи афонд Аҧсны» ахада Сенер Гогәуа ҷыдала ҳџьынџьуаа рзы иҟаиҵаз адныҳәалара зныз авидеонҵамҭа.

Аныҳәатә хәылҧазы иалахәыз алшара рыман аибашьра аҭоурых зҳәо авидеонҵамҭақәа рыхәаҧшра, иара убас аибашьра иарҿиаз ашәақәа разыӡырҩра. Ҳџьынџьуаа даара гәахәала ирыдыркылеит Аҧсны Аҳәынҭқарра раҧхьатәи ахада Владислав Арӡынба аибашьра  аантәи иҭоурыхтә қәгылара.

Ахәылҧаз аҿы иқәгылеит Кавказтәи  Аидгылара иалахәу амилаҭқәа рхаҭарнакцәа, Иорданиатәи апарламент адепутатцәа, аҳәынҭқарратә, ауаажәларратә усзуцәа, иара убас зыхьӡ нагоу, идыру ауаа. 

 Ақәгыларақәеи, авидеонҵамҭақәеи хадырҭәаауан Кавказ ажәларқәа рыкәашарақәеи, рышәаҳәарақәеи.

Subscribe to Syndicate