Максим Ӷәынџьиа ианашьоуп амедал "Жәларбжьаратәи аусеицура арӷәӷәаразы".

Иахьа, Приднестровтәи Молдавтәи Ареспублика иазгәанаҭоит Ахьыҧшымра 25шықәса ахыҵра. Убри инамаданы, Аҧсны иҟоу Приднестровтәи Молдавтәи Ареспублика ахаҭарнакра еиҿнакааит афотоцәыргақәҵа, Приднестровиа 25шықәса ахыҵра иазкны.

Ацәыргақәҵа аартуа, Приднестровтәи Молдавтәи Ареспублика анапхгараҭара ахантәаҩы ихаҭыҧуаҩ-амонополиа ҿагыларатә усуреи ахәҧсақәеи рхеилак ахантәаҩы Витали Улитка еизаз зегьы ҭабуп ҳәа раҳәауа иазгәеиҭеит, Аҧсни Приднестровиеи рыжәларқәа акыр шықәсатәи реиҩызареи русеицуреи аҧхьаҟа иҵегьы ишацҵахо.

Иалкаау аҳамҭақәа ранашьан Аҧсны аиҳабыра рхаҭарнакцәа, иара убас, аҩтәылак рыбжьара рыҿиарамҩа ахыҵхырҭақәа рҟны игылаз зегьы.

"Жәларбжьаратәи афонд Аҧсны" ахаҭарнак, жәларбжьаратәи аимадарақәа рыҟәша анапхгаҩы Максим Ӷәынџьиа ианашьан "Жәларбжьаратәи аусеицура арӷәӷәаразы" амедал.