«Сара Ҭырқәтәыла сыҟазаргьы, Аҧсны сатәуп, сгәы сыҧсадгьыл ахь иҟоуп.» Енгин Папба иҿцәажәара.

Embedded thumbnail for «Сара Ҭырқәтәыла сыҟазаргьы, Аҧсны сатәуп, сгәы сыҧсадгьыл ахь иҟоуп.» Енгин Папба иҿцәажәара.

- Зегь раҧхьаӡа иргыланы, иҭабуп ҳазҵаарақәа рҭак аҟаҵара шәахьақәшаҳаҭхаз. Аамҭа ҧшааны ҳахьшәыдышәкылаз. Шәара, Ноиабр мзазы имҩаҧысраны иҟоу, Ҭырқәтәылатәи Ареспублика Жәлар рпартиа ахьӡала, апарламент алхрақәа рахь депутатс шәкандидатура ықәгылоуп. Ақәҿиарақәа шәзеиӷьаҳшьоит!

Иҭабуп ҳәа шәасҳәоит. Ноиабр мза алагамҭазы, ишазгәашәҭаз еиҧш, Ҭырқәтәыла апарламент ахь алхрақәа азгәаҭоуп. Сара, абыржәы хынтәуп сықәгылоижьҭеи. Агәыӷра сымоуп сыгәҭакы наӡап ҳәа. Алхрақәа шалгаз еиҧш, Аҧсныҟа анеира сгәы иҭоуп. Сыҧсадгьыл гәхьаазгеит, афақьаҳәа уахь снеиуеит.

Шәара шәхымҩаҧгарала, ибзианы иаҳбарҭоуп, шәахьыҟазаалакгьы шәҭоурыхтә ҧсадгьыл шәшазыҟоу, шәусқәа раҧхьа ишгылоу. Шәықәгыларақәа рҟны иазгәашәҭоит, Ҭырқәтәылатәи апарламент аҟны депутатс шәыҟазаргьы, хылҵшьҭрала шәшаҧсыуоу, шәыжәлар ринтересқәа рыхьчара аҧхьа ишшәыргыло. Хҳәаас иҟашәҵои?

Уаҳа ҟалашьас иамоузеи?! Сара, депутатк иаҳасабала, Ҭырқәтәыла аҳҭны  қалақь Анкара имҩаҧысыз  раҧхьатәи аизараҿы, сықәгылараҿы зегьы ирдырааит ҳәа ирыласҳәеит сшаҧсыуаз. Сахьыҟазаалакгьы исҳәо убри ауп: Сара саҧсыуоуп, сабдуцәа Аҧснынтә ихдырҵәаз ирхылҵшьҭроу соуп.  Сыжәла Папбоуп (Ҭаскәач-иҧа). Сара, Ҭырқәтәыла сыҟазаргьы, Аҧсны сатәуп, сгәы сыҧсадгьыл ахь иҟоуп. 

- Раҧхьаӡа акәны Аҧсныҟа шәанбанеи? Ишҧашәыдышәкылеи, ишҧашәзааи шәыҧсадгьыл?

Усҟан, Адаҧазар ақалақь анапхгараҿы аус зуан. Ақалақь аиҳабы иҟны сцеит, иасҳәеит аҧсадгьыл ҳәа Аҧсны шсымоу, сцар, избар шысҭахыу. Дақәшаҳаҭхеит, иаргьы ҳаҧхьа днаргыланы, апарламент адепутатцәа ҳацны ҳааит Аҧсныҟа, аибашьра аҧхьа. Зегь раҧхьаӡа убасҟан ауп  Аҧсны анызба.  Ҭырқәтәыла инхо сҩыза Бганба Орал дсыцын.  Исгәалашәоит, ҳалаӷырӡкәа шаауаз, ҳашҵәыуоз. Ԥхыӡу лабҿабоу сыздыруамызт сзықәшәаз.  Аҟәа, ашьапылампылтә стадион ахь ҳаргеит, ампыл асра ҳахәаҧшырц. Ауаа рацәа ыҟан.  Ашьшьыҳәа, аҧсышәала ицәажәоз ҳарзыӡырҩуан.  Анаџьалбеит, ҳаҧсадгьыл аҟны ҳаҟоума? -ҳәа иџьаҳшьон, ахаҵара ҳцәыуадаҩын.  Ус, ажәабжь рыларҳәеит, Ҭырқәтәылантәи ҳашьцәа ҳзааит Енгин Папбеи, Орал Бганбеи ҳәа. Сара сыҧсуаз џьысшьеит, убас сгәы ҭыҵны ацара иалагеит.  Рызегьы анапеинҟьара иалагеит.  Ампыл иасуаз ахәмарыҩцәа ҳааигәа иааит, ҳнапқәа еимданы аҧсшәа еибаҳҳәеит.   Урҭ амшқәа, сыҧсы ҭанаҵы исхашҭраны сыҟаӡам. Ажәа-Аҧсадгьыл, зегь аҳәоит.

- Араҟа иазгәашәҭеит, усҟан аибабарақәа шаҟа агәыбылра рыцыз.  Уажәы, аиҭанаиааирақәа еиҳа имариахеит, аибабарақәа рымҽках аҽарҭбааит. Шәара депутатк иаҳасабала, ирацәоуп арепатриациа аус аҟны шәызлацәажәо азҵаарақәа. Реиҳа иалышәкаауеи?

Сара зегь рпаҧхьаӡа иргыланы, Ҭырқәтәыла инхо аҧсуааи, Аҧсны инха аҧсуааи реимадара аҳәаақәа рырҭбаара ауп исҳәо, амшынтә мҩа, аҳаиртә мҩа аартра. Уажәы, ҩаҧхьа апарламент ашҟа снеины саныҟала,  уи азҵаара хымҧада ишьҭысхуеит.  Аҧснытәи апарламент ахьӡала Ҭырқәтәыла сыҟоуп сҳәалоит зны-зынла саахәмаруашәа.  Аха, ус егьыҟоуп ҳәа сахәаҧшуеит.

- Аҧсны ахақәиҭра амоуп. Адунеи ҳәынҭқаррақәак уи ахьыҧшымра азхаҵара азгәарҭахьеит. Ари азҵаара шәышҧазнеиуеи шәара?

Аҧсны  иамоу ахақәиҭра, ахьыҧшымра, адунеи зегьы  ирдырроуп. Анкара ҭыҧк ааҳартырц ҳҭахыуп, ацҳаражәҳәарҭа. Аҧсны иадҳәалоу аофициалтә ҟазшьа змоу аусмҩаҧгатәқәа зегьы, уа еиҿаҳкааларц ҳҭахыуп.   Усҟан, Аҧсны ззымдыруагьы, изакәу  еиҳа еиликаап, иалацәажәо иалагап.  Ааигәа, еиуеиҧшым апартиақәа рҟынтә  апраламент адепутатцәа сыманы Аҧсны снеит. Ирбеит, еилыркааит Аҧсны хатә ҳәынҭқарраны ишыҟоу. Ҭырқәтәылаҟа ианыхынҳәгьы, иџьашьаны аӡбахә иалацәажәон. Иҳалшо акры ыҟазар ҳадгылоит ҳәа ицәажәогьы иалагеит.  Иҟаҳҵаша аусқәа рацәоуп.

Адаҧазар, Сақариа  ақалақь Аҧснынтә иреиҳау аҵараиурҭақәа ирҭо астудентцәа ҳамоуп. Иааидкыланы, имаҷҩым, Ҭырқәтәыла аҵара зҵо. Уи агәахәа алаҳхуеит. Адырра бзиақәа рыманы, рыҧсадгьыл ахь ихынҳәуеит ҳәа агәыӷра ҳамоуп.

- Шәара, шәқыҭа иарбану Ҭырқәтәыла?

Сара Каиалар ақыҭаҿы сынхоит. Аҧсыуа қыҭоуп, иҳаиуам уаҩ дҳалаӡам. Уи ҳаиҳабацәа раахыс ус иҟоуп. Ҳаҧсуара ныҟәаҳгоит. Сыҩнаҭаҿы избаз алеишәа ныҟәызгоит иахьа уажәраанӡа.  Сгәырӷьоит саҧсыуаны Анцәа сахьишаз.  Ҳаиҳабацәа срызгәыдууп. Есқьишьеҳиртәи ауниверситет аекономикатә факәльтет салгеит.  Анаҩс, Адаҧазар, ақалақьтә усбарҭа  аиҳабыраҿы аусура салагеит.   Ҩынтә, Ҭырқәтәылатәи апарламент депутатс салырххьеит, уажәы хынтәны сықәгылоит. Алхрақәа рҟны аиааира зганы сҟалар, схы шьҭыхны, сахьаҧсыуоу сазгәыдуны Аҧсныҟа снеиуеит.

- Аҧсныҟа, шәыуаажәлар рахь ишәҳәарц акыр шәҭахызар, гәахәала ҳашәзыӡырҩеит.

Сыуаажәлар даараӡа шәыгәхьаазгоит. Ҭыҧла ҳаицәыхаразаргьы, гәыла ҳаицуп. Ҳара аҭоурых ҳаҩнашазаргьы,  аҽеидкылара ҳаҿуп. Сара сыҩны Аҧсны асахьақәа иахьабалак икыдуп. Аҧсны иҟоу сашьцәа, саҳәшьцәа, сҭынхацәа, сыуаажәлар зегьы, даараӡа салам шәзынасышьҭуеит Ҭырқәтәылантә. Ааигәа  ҳаибабап ҳәа агәыӷра сымоуп. Ишәхыжәгахьо шәџьабаақәа рацәоуп. Абзиарақәа рацәаны Анцәа ишәаҭәеишьааит!

 - Даара гәахәала ҳашәзыӡырҩит. Иҭабуп даара. Шәусқәа рҿы аихьӡарақәа шәзеиӷьаҳшьоит!