Зчымазара ҧку ахәыҷқәа Пицунда ақалақь, "Адельфинари" иаҭааит.

"Жәларбжьаратәи афонд Аҧсни", Пицунда ақалақь аҧсшьарҭатә ҩнқәа реидгылеи ирыбзоураны,  сынтәа ҩынтәуп Аҧсны араионқәа зегьы  рҟынтә згәабзиара ҧку ахәыҷқәа, Пицунда иҟоу "Адельфинариахь" аныҟәарақәа рзеиҿкааужьҭеи.

Агәыҧ еиднакылон зынӡа 80-ҩык, 50-ҩык ахәыҷқәеи, урҭ мҩаҧызгоз 30-ҩык аҭаацәеи. Адельфинари аҟны ахәыҷқәа гәахәарыла ирыхәаԥшит ақәгыларақәа, анаҩс аниматорцәа рыбзоурала урҭ  ирзеиҿкаан ахәмаррақәа,  рхы рыладырхәит аицлабрақәа,  хымҧада ирбаз-ираҳаз акыр еигәырӷьеит. Ахәыҷқәа рахьтә иҟоуп Пицунда ақалақь раҧхьаӡа акәны иаҭааз.

Ахәыҷқәа шьыбжьхьа анырфа анаҩс,  алшара рыман Пицундатәи ауахәама аҭаара, урҭ уаҟа ирзеиҭаҳәан аҭоурых. Иара убас, адәыӷба хәыҷқәа рыла Пицунда агаҿа иқәсит.

"Жәларбжьаратәи афонд Аҧсны"ахада Сенер Гогәуа, иахьатәи аныҳәатә программа ихы алаирхәит. Иара убас, афонд ахьӡала  ахәыҷқәа мҩаҧыргон Сабина Быҭәҧҳаи, Мџьыҭ Гогәуеи. Иазгәаҭатәуп, аиҿкааратә усқәа рҟны ахаҵгылара шааирԥшыз «Жәларбжьаратәи  афонд  Аԥсны» Пицундатәи ахаҭарнак Слава Сақаниа.

Аҭаацәеи ахәыҷқәеи ҷыдала ҭабуп ҳәа рарҳәоит иахьатәи аныҳәа еиҿызкааз, ахаҵгылара азҭаз, афонд ахада Сенер Гогәуеи, Пицундатәи аҧсшьарҭатә ҩнқәа реидгыла адиректор хада  Нодар Шьаҟрыли, иара убас ари аусмҩаҧгатә ацхыраара азҭаз зегьы.