Згәабзиара уашәшәыроу аибашьра аветеранцәа аҳамҭақәа ранашьоуп

Embedded thumbnail for   Згәабзиара уашәшәыроу аибашьра аветеранцәа аҳамҭақәа ранашьоуп

Иахьа, Аҟәа ақалақь, Владислав Арӡынба ихьӡ зху аибашьратә фырхаҵара ахьӡ-аҧша аҳәынҭқарратә музеи аҟны, зымаха-зышьаха еибгам аибашьра аветеранцәа аҳамҭақәа ранашьан.

«Жәларбжьаратәи афонд Аҧсны» аҧшьгарала, хаҭала  Оқтаи Ҷкотуа ибзоурала, Аҧсни  аҳәаанырцә инхо аҧсуа-дыга диаспора иҟарҵаз ацхыраарарала, згәабзиара уашәшәыроу  аибашьра аветеранцәа ҳамҭас ирыҭан аколиаскақәа. Урҭ рхыҧхьаӡара зынӡа 11 цыра ыҟоуп. Ҩба, Аҟәатәи ахәыҷтәы реабилитациатә центр ианашьан. Аиҧылараҟны ажәа зҳәоз иазгәарҭеит, ҳҳәынҭқарра ашьақәгылара аҟны ҳаибашьцәа рылша шырацәоу, излаҳалшоу ала ҳарҭгьы адгылара раҳҭалар шакәу.

«Ашықәс Ҿыц аманшәалара шәзаанагаит, агәабзиара шәыгымзааит. Шәара шәфырхаҵара ҳара еснагь пату ҳзақәуп. Иахьа маҷк иадымхаргьы шәгәалаҟара ҳзышьҭыхзар, гәахәас иҟаҳҵоит»-иҳәеит «Жәларбжьаратәи афонд Аҧсны» ахада Сенер Гогәуа.

Аиҧылараҿы Оқтаи Ҷкотуа иазгәеиҭеит ари аидеиа ахы шыҵнахыз атәы. 

«Чарак аҿы ҳаиқәшәеит аибашьра аветеран Аслан Ҭырқьбеи сареи. Избеит Аслан иҩызцәеи иареи, иахьа рҭагылазаашьа шыуадаҩу, акыр ҳаицәажәеит. Аҩны санааи, сгәала аинтернет аҿы изҩит. Иаразнак  рыбжьы ақәдыргеит ҳџьынџьуаа аӡәырҩы, ирҳәеит ацхыраара шыҟарҵо. Абас ала еизган аколиаскақәа рзы аҧара»-иҳәеит Оқтаи  Ҷкотуа.

Аиҧылара рхы аладырхәит Аҟәа ақалақь анацәа рхеидкыла алахәылацәа, Аҧсны абыргцәа реилазаара аиҳабы Аполлон Шьынқәба, згәабзиара уашәшәыроу ауаа рзы афондқәа рхаҭарнакцәа, аветеранцәа рыуацәа рҭанхацәа уҳәа  ауаажәларра.

Аҳамҭақәа зыхьӡала иҟаз аветеранцәа зегьы иахьатәи аиҧылара рхы рзаламырхәызаргьы, «Жәларбжьаратәи афонд  Аҧсны» ахаҭарнакцәа урҭ аҳамҭақәа рыҩныҟа ирызнаргоит.

Аиҧылара иалахәыз аибашьра аветеранцәа  Аслан Ҭырқьба, Асҭамыр Шьоуа, Руслан Оҭырба, Ашоҭ Аҭиан ҭабуп ҳәа рарҳәеит ас еиҧш иҧшьоу ауснагӡатәқәа еиҿызкааз зегьы.