«Жәларбжьаратәи афонд Аҧсныи», Арҵаратә центр «Академиеи» , аиқәышаҳаҭра рнапы аҵарҩит.

Ауаажәларратә еиҿкаара «Жәларбжьаратәи афонд Аҧсныи», изыцҵоу аҵаразы иҳәынҭқарратәым арҵаратә усҳәарҭа «Арҵаратә центр  «Академиеи», аҧхьаҟатәи русеицуреи реиҩызареи рзы аиқәышаҳаҭра рнапы аҵарҩит. Иазгәаҭоу аҧҟарақәа инарықәыршәаны, аҵарадырреи, акультуреи ирызкыу еицырзеиҧшу апроектқәеи апрограммақәеи аус рыдырулалоит.

Арҵаратә центр «Академиа» адиректор Ирина  Ҷкадуаҧҳа, «Жәларбжьаратәи афонд Аҧсны» ахада Сенер Гогәуа ҭабуп ҳәа иалҳәеит, аханатә ари ацентр аҧҵараҟны ацхыраареи, адгылареи ахьеиҭаз.

«Арҵаратә центр «Академиа» мызки бжаки роуп иҵуа иаҧҵоижьҭеи. Араҟа ҧшьбызшәак рҵоит:  аҧсшәа, аурысшәа, англыз бызшәа, аҭырқәа бызшәа. Арҵаҩцәа рҧышәа ҳаракыуп. Иахьатәи аамҭазы аҵара рҵоит 80-ҩык аҵаҩцәа. Есыҽны арзаҳалқәа ҳадаҳкылоит. Аҵара рҵарц рылшоит агәаҳәара змоу зегьы. Ашықәс анҵәамҭазы, англыз бызшәеи, аҭырқәа бызшәеи зҵо рыбжьара аицлабра амҩаҧгара ҳгәы   иҭоуп. Аиааира згаз абызшәақәа ртәылахь иҳашьҭуеит»-лҳәеит Ирина Ҷкадуаҧҳа.

Ахәҭакахьала, «Жәларбжьаратәи афонд Аҧсны» ахада Сенер Гогәуа иазгәеиҭеит, ас еиҧш арҵаратә центр аартра хра злоу акакәны дшахәаҧшуа.

«Хымҧада, зегь раҧхьа иргыланы ухатәы бызшәа удыруазароуп. Ҳазҭагылоу аамҭазы, атәым бызшәақәа рдырра акырӡа ихәарҭоуп. Ҳара ари ацентр апроект аҧшьгара алзыршаз ҳауп. Иахьазы, уи аусура гәахәала иҳадаҳкылоит, аҧхьаҟагьы излаҳалшо ала адгылара аҳҭоит»-ҳәа азгәеиҭеит афонд ахада Сенер Гогәуа.

Зҵара дырра аизҳара иашьҭоу ирылшоит ари ацентр аҟны, аҳәаанырцәтәи абызшәақәа рдырра арҭбаара. Адырра еснагь ҧхьаҟа узго мҩоуп. Убри хықәкыс иаман иҳәынҭқарратәым аҵараиурҭа заҧшьгарала иаатыз «Жәларбжьаратәи афонд Аҧсны».