«Жәларбжьаратәи афонд Аԥсны» ҳџьынџьуаа аԥсуа бызшәа арҵара акурсқәа рзеиҿнакааит Ҭырқәтәыла.

Ҭырқәтәыла, Адаԥазар Сақариатәи аԥсуаа рхеидкыла «Жәларбжьаратәи афонд Аԥсны» ашҟа ааԥхьара ҟанаҵеит аԥсуа бызшәа  дзырҵо арҵаҩы дырзаарышьҭырц. Ари аус иаразнак рыбжьы ақәдыргеит Сенер Гогәуа хадара ззиуа афонд. Оқтаи  Ҷкотуа  иаразнак ҭелла сиԥшааит, исарҳәеит  ҳџьынџьуаа иҟарҵаз аҳәара атәы .

Ҭырқәтәыла, Адаԥазар Сақараиа ақалақь иҟоу  аԥсуаа рхеидкыла  аҭаххара инақәыршәаны, Аԥсны аҵараеи аҭҵаарадырреи рминистрра ақәшаҳаҭхарала, «Жәларбжьаратәи афонд Аԥсны» ахарџьала,  Ҭырқәтәыла,  аԥсуа бызшәа дырҵаразы   Ҭырқәтәылаҟа дышьҭуп Аза Шамԥҳа.

«Сара аусура нап асыркит Декабр 1 инаркны.  Сақариатәи  аԥсуаа ркультуратә центр аҟны(адернеқь) аус зуеит аҩашеи аԥшьашеи, асааҭ быжьба инаркны жәаба рҟынӡа. Ахашаҽны Соуксу - Џьгьарда ақыҭан. Аԥшьаҽаны Адаԥазар сыҟоуп. Ахәашаҽны  аԥсшьара сымоуп. Асабшаҽны асааҭ ԥшьба инаркны жәба рҟынӡа аус зуеит Каиалар, уа ҩгәыԥк сымоуп. Анаҩс Балбалаҟа сиасуеит.  Зықәра еиҳа имаҷу гәыԥк еиднакылоит, ихбыџқәоу даҽа гәыԥк» - лҳәеитаԥсуа бызшәа арҵаҩы Аза Шамԥҳа.

«Аҿар аҵара апроцесс ишԥазнеиуеи, рхатәы бызшәа шԥарыцааиуеи, аҩра, аԥхьара шԥарыдыркылои, ирцәыуадаҩума?» - ҳәа ҳазҵаара аҭак ҟаҵо, Аза иазгәалҭеит:

«Агәыԥқәа зегьы еиԥшӡам. Уажәы Адаԥазар иҟоу абызшәа зҳәо, аха аҩышьеи аԥхьашьеи ззымдыруа ыҟоуп. Урҭ анбанқәа ҵаны иаԥхьоит, иану еилыркаауеит.  Анбанқәа рҵахьеит Каиалар, Адаԥазар. Ашьҭыбжьқәа аԥсуа бызшәа ирацәаны иалоуп, дара рҟны анбанқәа маҷуп, ашьҭыбжьқәа ирхылҵуагьы маҷуп. Иуадаҩу ашьҭыбжьқәа рацәоуп, аха ус егьа иҟазаргьы сара избоит агәаҳәара шрымоу, идурҵар шалшо. Иқәыԥшқәоуп, уажәы иҟарҵо ашьаҿа маҷшәа иаҳбозаргьы, рбызшәа ашҟа абзиабара агьама зкыз аԥхьаҟа иҵегьы еихарҳауеит, рбызшәа иацәтәымны иҟалаӡом».

Аза Шамԥҳа, ҭабуп ҳәа ралҳәоит   лусқәа зегьы зырманшәало, еҳәшьа дук леиԥш илывагылоу, зылша акырӡа ирацәоу ари аус аҟны, заԥсуара згәы азыбылуа, аҭоурыхтә ԥсадгьыл иазҿлымҳу, адиаспора Аԥсны иадзыԥхьало, аиҿкааратәи арҵаҩратә усқәеи реиҿкаара знапы иҵызхуа, ахәыҷқәа уи аганахь ала абзиабара рылазааӡо  Зеррин Орҳан-иԥҳа Шамба, «Жәларбжьаратәи афонд Аԥсны» ахада Сенер Гогәуа, иара убас  аус ахаҵгылара азҭаз.